کوئٹہ (سید سردار محمد خوندئی)
بلوچستان یونیورسٹی آف انفارمیشن ٹیکنالوجی، انجینئرنگ اینڈ مینجمنٹ سائنسز (بیوٹمز) کے سکول آف لاء میں موٹ کورٹ کا باقاعدہ افتتاح کر دیا گیا۔ چیف جسٹس بلوچستان ہائی کورٹ جسٹس کامران خان ملاخیل نے افتتاحی تقریب میں بطور مہمان خصوصی شرکت کی۔ موٹ کورٹ کے قیام کا مقصد طلبہ کو عملی قانونی تربیت فراہم کرنا اور صوبے میں معیاری قانونی تعلیم کو فروغ دینا ہے۔
تقریب میں وائس چانسلر بیوٹمز پروفیسر ڈاکٹر خالد حفیظ، پرو وائس چانسلر پروفیسر ڈاکٹر میر وائس کاسی، ہائی کورٹ کے رجسٹرار، سینئر قانون دان علی احمد کرد، ہائی کورٹ کے سینئر ججز، وکلاء، یونیورسٹی افسران، اساتذہ اور طلبہ نے شرکت کی۔
تقریب سے خطاب کرتے ہوئے چیف جسٹس بلوچستان ہائی کورٹ جسٹس کامران خان ملاخیل نے کہا کہ موٹ کورٹ قانون کے طلبہ کو فرضی مقدمات کے ذریعے عدالتی کارروائی میں حصہ لینے اور عملی مہارتیں سیکھنے کا موقع فراہم کرے گی۔
انہوں نے کہا کہ طلبہ اس پلیٹ فارم پر قانونی تحقیق، مقدمات کی تیاری اور عدالت میں مؤثر دلائل پیش کرنے کی مشق کر سکیں گے۔ اس تربیت سے ان میں اعتماد، تنقیدی سوچ اور پیشہ ورانہ اخلاقیات کو فروغ ملے گا، جو ایک کامیاب وکیل کے لیے ضروری ہیں۔
چیف جسٹس نے یقین دہانی کرائی کہ بلوچستان ہائی کورٹ، بیوٹمز سکول آف لاء کی تکنیکی معاونت اور تعلیمی معیار بہتر بنانے کے لیے اپنا تعاون جاری رکھے گی۔ انہوں نے صوبے میں اعلیٰ تعلیم اور جدید تعلیمی رجحانات کے فروغ کے لیے بیوٹمز کے کردار کو بھی سراہا۔
وائس چانسلر پروفیسر ڈاکٹر خالد حفیظ نے اپنے خطاب میں کہا کہ بیوٹمز سکول آف لاء قانونی تعلیم کو عصر حاضر کے تقاضوں سے ہم آہنگ کر رہا ہے۔ ان کے مطابق، یونیورسٹی قانونی تعلیم کو روایتی طریقہ تدریس تک محدود رکھنے کے بجائے مصنوعی ذہانت (AI)، فرانزک سائنس اور جدید ٹیکنالوجی سے منسلک کرنے پر توجہ دے رہی ہے۔
انہوں نے کہا کہ اس اقدام سے طلبہ کو ڈیجیٹل شواہد، سائنسی تجزیے اور پیچیدہ قانونی معاملات کو بہتر طور پر سمجھنے میں مدد ملے گی۔
بیوٹمز میں موٹ کورٹ کا قیام قانونی تعلیم کو عملی تجربے سے جوڑنے کی جانب ایک اہم قدم ہے۔ اس سے طلبہ کو پیشہ ورانہ زندگی میں داخل ہونے سے پہلے عدالتی ماحول سے واقفیت اور اپنی قانونی صلاحیتیں بہتر بنانے کا موقع ملے گا۔
